Дональд Трамп Эрон билан келишувга эришилмаган тақдирда “кенг кўламли вайронагарчилик” юз бериши мумкинлигини билдирди. Бу эса Эрон томонидан ҳам кескин жавоб баёнотлари берилишига сабаб бўлди.
Эрон ҳарбийлари вакилига кўра, агар АҚШ ҳамда Исроил можарони кучайтиришда давом этса, бутун минтақа “дўзах”га айланиши мумкин.
Маълум қилинишича, шанба куни Эрон Форс кўрфази давлатлари, Ироқ ва Исроилга ракета зарбалари берган. Ушлаб қолинган ракеталар қолдиқлари айрим ҳудудларда зарар келтирган.
Шу билан бирга, АҚШ ва Эрон кучлари жанубий Эрон осмонида АҚШнинг F-15 жанговар самолёти уриб туширилганидан сўнг йўқолган америкалик экипаж аъзосини қидириш ишларини олиб бормоқда. АҚШ оммавий ахборот воситалари маълумотига кўра, учувчи қутқарилган.
Эрон расмийлари аҳолини бедарак йўқолган экипаж аъзосини тирик ҳолда топишга чақирмоқда ҳамда уни қўлга олганлар учун мукофот ваъда қилган.
Шунингдек, Трамп Truth Social тармоғидаги баёнотида, агар 48 соат ичида Ҳормуз бўғози очилмаса, “бутун дўзах уларга ҳукмронлик қилади”, дея огоҳлантирган.
Кейинчалик “Хатам ал-Анбия” марказий штаби матбуот котиби Эброҳим Золфагҳорий ҳам кескин баёнот бериб, “Агар душманлик кучайса, бутун ҳудуд сиз учун дўзахга айланади. Эронни енгиш ҳақидаги хаёллар ботқоққа айланади ва сиз унга чўкиб кетасиз”, дея таъкидлаган.
Трамп, шунингдек, ўз баёнотида ҳужумлардан сўнг Эроннинг қатор ҳарбий раҳбарлари лавозимидан олинганини ҳам қайд этган.
