Тошкент метросида поезд 30 дақиқа давомида туннел ичида тўхтаб қолгани ҳақида хабарлар тарқалди. Мазкур ҳолат юзасидан метрополитен ахборот хизмати расмий изоҳ берди.
Маълум қилинишича, 28 март куни соат 11:49 да “Халқлар дўстлиги” бекатига кириб келган 15-сонли, 1984 йилда ишлаб чиқарилган ҳаракат таркибида қисқа муддатли техник носозлик аниқланган.
Қайд этилишича, носозлик аниқлангач, машинист поезд нозирига хабар берган. Вазият назоратга олиниб, йўловчилар бекатда туширилган ҳамда ҳаракат таркиби техник кўрик йўлагига олиб чиқилган.
Идора ижтимоий тармоқларда метро поездлари тўқнашгани ҳақидаги хабарлар асоссиз эканин маълум қилди. Метро бекатида техник носозлик сабаб тўхтаб қолган ҳаракат таркиби белгиланган тартибда ортдан келаётган бошқа поездга тиркама қилинган ҳолда техник кўрик йўлагига олиб кетилган.
Шунга қарамай, айрим саҳифаларда ҳақиқатга тўғри келмайдиган маълумотлар тарқатилаётгани қайд этилди. Метрополитен ижтимоий тармоқ фойдаланувчиларини текширилмаган ахборотларни тарқатмасликка чақирди ҳамда ёлғон хабарлар учун амалдаги қонунчиликка мувофиқ жавобгарлик борлигини эслатди.
“Тошкент метрополитени” мазкур ҳолат вақтинчалик ноқулайликларга сабаб бўлганини билдириб, йўловчилардан узр сўради ҳамда хавфсиз, узлуксиз ва сифатли хизмат кўрсатиш устувор вазифа эканини таъкидлади.
