Аввалроқ Баку шаҳридаги BI ES VIP клиникасида халқ табобати билан шуғулланган Иқбол Солиев қўлга олингани ҳақида хабарлар тарқалган эди. Озарбайжон нашри Lenta.az маълум қилишича, у полиция бўлимида қонунчиликка мувофиқ жавобгарликка тортилган.
Шундан сўнг Солиев Озарбайжон ҳудудидан чиқариб юборилган.
Маълум қилинишича, у клиникада беморларни ноқонуний даволаган. Бу пайтда муассаса олдида катта навбат ва тартибсизликлар юзага келган. Солиев биоэнергия ёки энергия терапияси билан даволашини айтиб, ҳар бир бемордан 60 манат (тахминан 400 минг сўм) олган.
Клиника маълумотига кўра, Иқбол Солиев ушбу тиббиёт муассасасининг ходими бўлмаган. Шунга қарамай, у икки кун давомида беморларни қабул қилиб, кейин клиникани тарк этган.
Аввалроқ у вилоят суди қарори билан 10 суткага қамалган эди. 30 декабрь куни эса ўзининг Instagram саҳифаси орқали озодликка чиққанини маълум қилиб, табобат билан шуғулланиш учун расмий рухсати йўқлиги ҳақидаги хабарларни рад этган.
