ДХХ ва ИИО ходимлари ҳамкорлигида Навоий шаҳрида Туркиядан Қирғизистон орқали Ўзбекистонга олиб келинган қалбаки АҚШ доллари савдоси билан шуғулланаётган шахслар ушланди.
Наманган вилоятида истиқомат қилувчи 1984 йилда туғилган шахс ўзининг жиноий шериги билан биргаликда 100 АҚШ долларлик купюрадаги 19 900 долларлик қалбаки пулни харидорга 14 000 долларга сотишга уринган пайтда тўхтатилган.
Шунингдек, Тошкент шаҳрида ҳам 1997 йилда туғилган шахс қалбаки 100 доллар ва 100 минг, 50 минг сўмлик купюраларни ҳақиқий 5 500 долларга сотишни ваъда қилган пайтда ушланди.
Ҳозирда уларга нисбатан Жиноят кодексининг 176-моддаси 3-қисми “а” банди билан жиноят иши қўзғатилган ва “қамоқ” эҳтиёт чораси қўлланган. Тергов ҳаракатлари олиб борилмоқда.
