Учрашувда Ўзбекистон ва Буюк Британия ўртасидаги ўзаро манфаатли шерикликни, аввало савдо-иқтисодий соҳада янада кенгайтириш масалалари муҳокама қилинди. Сиёсий мулоқот жадал ривожланаётгани, барча даражаларда фаол алмашинувлар давом этаётгани қайд этилди. Хавфсизлик соҳасида самарали ҳамкорлик йўлга қўйилгани таъкидланди.
Сўнгги беш йилда товар айирбошлаш ҳажми икки баробар ошган. London Stock Exchangeда Ўзбекистоннинг 15 миллиард доллардан ортиқ қийматдаги суверен ва корпоратив облигациялари жойлаштирилган. Шунингдек, ўтган йили Қўшма иқтисодий қўмита механизми ишга туширилди.
Таълим соҳасида британиялик ҳамкорлар билан Президент мактаблари ташкил этилган, учта қўшма университет фаолият юритмоқда. Ўзбекистонга ташриф буюраётган британиялик сайёҳлар сони ҳам ортиб бораётгани қайд этилди.
Суҳбат давомида энергетика, молия, геология, транспорт, кимё, фармацевтика, фан ва таълим йўналишларида янги лойиҳаларни илгари суриш муҳимлиги таъкидланди. Учрашув якунида кўп қиррали ҳамкорликни янада ривожлантириш бўйича қўшма “йўл харитаси”ни қабул қилишга келишиб олинди.
