Дональд Трамп маъмурияти Шимолий Кореяга халқаро гуманитар ёрдам етказиб беришга қўйилган чекловларни олиб ташлаш ниятида. Бу ҳақда The Wall Street Journal хабар берди.
Қайд этилишича, гап БМТ Хавфсизлик кенгашининг КХДРга нисбатан санкциялар қўмитасида гуманитар юклар учун бериладиган санкцион истисноларни блокдан чиқариш ҳақида бормоқда. Бир неча ой давомида АҚШ гуманитар таъминот мақсадсиз ишлатилиши мумкинлигидан хавотир билдириб, рухсатномалар берилишини музлатиб келган. Нашр маълумотларига кўра, эндиликда Вашингтон барча чекловларни бекор қилишни режалаштирмоқда, бу эса халқаро ёрдам йўлини очади.
Қарор КХДР етакчиси Ким Чен Иннинг Россия ва Хитой билан алоқалари чуқурлашиб бораётган бир пайтда қабул қилингани таъкидланмоқда. Шу билан бирга, газетанинг қайд этишича, гуманитар ёрдамнинг қайта йўлга қўйилиши Пхеньян ва Вашингтон ўртасидаги муносабатлар яхшиланишини англатмайди.
WSJ маълумотларига кўра, Ким Чен Ин сўнгги йилларда Трампнинг ташаббуслари ҳамда ўтган йили Жанубий Корея президенти этиб сайланган, корейслараро муносабатларни яхшилаш тарафдори бўлган Ли Чжэ Мённинг саъй-ҳаракатларига қарамай, АҚШ ёки Жанубий Корея билан мулоқотга қизиқиш билдирмаган.
