5 февраль куни Исломобод шаҳрида Ўзбекистон Республикаси Президенти Шавкат Мирзиёев ва Покистон Ислом Республикаси Бош вазири Шаҳбоз Шариф тор доирада музокара ўтказиб, Олий даражадаги Стратегик ҳамкорлик кенгашининг биринчи йиғилишини ўтказди.
Учрашувда Ўзбекистон – Покистон стратегик шериклик муносабатларини янада ривожлантиришнинг устувор йўналишлари белгиланди.
Қайд этилишича, ўтган йил якунларига кўра ўзаро савдо ҳажми салкам 500 миллион долларга етган. Томонлар яқин келажакда товар айирбошлашни 2 миллиард долларга етказиш вазифасини қўйди.
Шунингдек, қишлоқ хўжалиги, фармацевтика, енгил саноат ва бошқа соҳаларда қарийб 3,5 миллиард долларлик қўшма лойиҳалар портфели шакллантирилди.
Транспорт-логистика алоқаларини кучайтириш, жумладан, Трансафғон темир йўли лойиҳасини жадаллаштириш муҳимлиги таъкидланди. Музокаралар якунида Шавкат Мирзиёев Шаҳбоз Шарифни жавоб ташрифи билан Ўзбекистонга таклиф қилди.
