Ижтимоий тармоқларда мактабларда анъанавий — қоғоз кундалик ва синф журналлари қайта жорий этилаётгани ҳақида хабарлар тарқалди. Мактабгача ва мактаб таълими вазирлиги ушбу маълумотларга изоҳ берди.
Вазирликка кўра, мактабларда қоғоз кундаликларга қайтиш бўйича ҳеч қандай топшириқ берилмаган. Амалдаги тартибга мувофиқ, барча умумтаълим мактабларида ўқувчиларнинг давомати ва баҳолари eMaktab электрон журнал тизими орқали юритилмоқда.
Қайд этилишича, электрон тизим ўқитувчиларнинг иш юкламасини камайтириш, баҳолашда шаффофликни таъминлаш ва ота-оналарга фарзандларининг ўқишини масофадан кузатиш имконини беришга хизмат қилмоқда.
Вазирлик рақамлаштириш жараёнлари ортга қайтмас тус олганини таъкидлаб, тарқалаётган хабарлар ҳуқуқий асосга эга эмаслигини маълум қилди.
