Ўзбекистонда интернет орқали ҳақорат қилиш, уятли сўзлар билан сўкиниш ва ҳақоратомуз шилқимлик учун маъмурий жавобгарлик жорий этилиши мумкин. Буни назарда тутувчи қонун лойиҳаси 3 февраль куни Олий Мажлис Қонунчилик палатасида биринчи ўқишда қабул қилинди.
Лойиҳага кўра, Маъмурий жавобгарлик тўғрисидаги кодекс 183-1-модда билан тўлдирилиб, телекоммуникация тармоқлари ва интернетда жамоат тартиби ҳамда фуқаролар осойишталигини бузувчи хатти-ҳаракатлар учун жавобгарлик белгиланмоқда.
Депутат Хушвақт Ҳайитовнинг таъкидлашича, мазкур норма ижтимоий тармоқларда ҳуқуқбузарликлар кўпайиб бораётгани билан боғлиқ. У бундай ҳолатлар жамиятда ахлоқсизлик ва тажовузкорлик кайфиятини кучайтираётганини қайд этди.
Шунингдек, “Миллий тикланиш” партияси етакчиси Алишер Қодиров ҳам қонун лойиҳасини қўллаб-қувватлади. Унинг айтишича, ижтимоий тармоқларда ҳақорат ва камситиш учун 5 миллион сўмгача жарима ёки 10 суткагача маъмурий қамоқ жазоси белгиланиши кўзда тутилмоқда.
Қонун лойиҳаси билан кодекс янги 189-3-модда билан ҳам тўлдирилиб, интернетда ўз ҳуқуқбузарлигини тарқатган шахслар учун ҳам жавобгарлик жорий этилиши режалаштирилган.
