O‘zbekistonda internet orqali haqorat qilish, uyatli so‘zlar bilan so‘kinish va haqoratomuz shilqimlik uchun ma’muriy javobgarlik joriy etilishi mumkin. Buni nazarda tutuvchi qonun loyihasi 3 fevral kuni Oliy Majlis Qonunchilik palatasida birinchi o‘qishda qabul qilindi.
Loyihaga ko‘ra, Ma’muriy javobgarlik to‘g‘risidagi kodeks 183-1-modda bilan to‘ldirilib, telekommunikatsiya tarmoqlari va internetda jamoat tartibi hamda fuqarolar osoyishtaligini buzuvchi xatti-harakatlar uchun javobgarlik belgilanmoqda.
Deputat Xushvaqt Hayitovning ta’kidlashicha, mazkur norma ijtimoiy tarmoqlarda huquqbuzarliklar ko‘payib borayotgani bilan bog‘liq. U bunday holatlar jamiyatda axloqsizlik va tajovuzkorlik kayfiyatini kuchaytirayotganini qayd etdi.
Shuningdek, "Milliy tiklanish" partiyasi yetakchisi Alisher Qodirov ham qonun loyihasini qo‘llab-quvvatladi. Uning aytishicha, ijtimoiy tarmoqlarda haqorat va kamsitish uchun 5 million so‘mgacha jarima yoki 10 kungacha ma’muriy qamoq jazosi belgilanishi ko‘zda tutilmoqda.
Qonun loyihasi bilan kodeks yangi 189-3-modda bilan ham to‘ldirilib, internetda o‘z huquqbuzarligini tarqatgan shaxslar uchun ham javobgarlik joriy etilishi rejalashtirilgan.
