Россиянинг Уфа шаҳрида жойлашган 16-гимназияда 9-синф ўқувчиси ўқитувчи ва синфдошларига қарата ўқ узди. Бу ҳақда “РИА Новости“ хабар берди.
Маълум қилинишича, ҳодиса 3 февраль куни соат 11:00 атрофида содир бўлган. Ўқувчилардан бири дарсга пластик пневматик автомат билан кириб, ўқитувчи ва уч нафар синфдошига бир неча марта ўқ узган, шунингдек, петарда портлатган.
Ҳодиса ҳақида хабар келиб тушгач, воқеа жойига полиция, Росгвардия ва бошқа тезкор хизматлар етиб борган. 15 ёшли ўсмир зудлик билан қўлга олинган. Воқеа жойига Бошқирдистон Республикаси ички ишлар вазири Александр Воронежский ҳам борган.
Бошқирдистон раҳбари Радий Хабировнинг маълум қилишича, ҳодиса оқибатида жабрланганлар йўқ. Айни пайтда воқеанинг барча ҳолатлари ўрганилмоқда.
