Маълум қилинишича, пойтахт ИИББ ва Давлат хавфсизлик хизмати тезкор ходимлари томонидан фуқаро Ш. исмли шахснинг уйи холислар иштирокида кўздан кечирилганда турли гиёҳвандлик моддалари топилган. Хусусан, ошхонадаги шкафдан 82 дона гугурт қутиси ичида, пакетда, 60 дона кичкина бўлинган гугурт қутисида ҳамда музлаткичнинг паст қисмидан пакетга ўралган 10 дона қора ҳамда 90 дона кичкина скотч бўлакларига ўралган, ичида қора шилимшиқ модда топилган.
Бундан ташқари, 20 та пакет ичида пластилинсимон жигарранг ўткир ҳидли модда ҳам топилган. Фуқаро уларни алоҳида қадоқлаб, сотиш мақсадида тайёрлаган. Текшириш жараёнида 4 дона тарози ҳам топилган. Ушбу хонадондан миқдори 2 миллиард 29 миллион сўмга тенг бўлган жами 3 килограмм 755 грамм гиёҳвандлик воситалари аниқланиб, аҳоли орасида 18 минг 755 дона қадоқдаги оғу тарқалишининг олди олинган.
Маълум бўлишича, гумонланувчи қозон ва чўмич ёрдамида гиёҳвандлик воситаларини тайёрлаб, тарозида ўлчаб, алоҳида-алоҳида қилиб қадоқлаган. Далилий ашёлар далолатномалар асосида олиниб, Ички ишлар бўлимининг навбатчилик қисмига топширилган.
Мазкур ҳолат юзасидан Жиноят кодексининг 273-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан жиноят иши қўзғатилиб, гумонланувчига нисбатан “қамоқ” эҳтиёт чораси танланган. Ҳозирда дастлабки тергов ҳаракатлари олиб борилмоқда.
