Самарқанд вилоятининг Пайариқ туманида аёл туғуруқхона олдида чақалоғини дунёга келтириб, ҳожатхонанинг чиқинди қутисига ташлаб кетди. Ҳолат юзасидан янги тафсилотлар маълум бўлди.
Тафсилотларга кўра, тиббиёт муассасаси шифокорларининг билдиришича, ҳодиса 27 декабрь куни содир бўлган. Тиббиёт бирлашмасига қайнонаси билан келган аёл тиббий кўрикдан ўтишдан бош тортиб, қабзиятдан шикоят қилган ва клизма сўраб мурожаат қилган. Шифокор томонидан текширув ўтказиш ҳамда УТТ қилиш таклиф этилган, бироқ бемор бунга рози бўлмаган. Аёл 4 ойлик келин бўлган.
Шундан сўнг аёл муолажа хонасига йўналтирилган. Муолажа жараёнида у ҳамширадан уни ёлғиз қолдиришни сўраган. Орадан бироз вақт ўтгач, хонани текширган тиббиёт ходимлари челак ичида чақалоқ қолдириб кетилганини аниқлаган.
Маълум бўлишича, аёл муолажахонада туққан ва шундан сўнг тиббиёт муассасасини тарк этган. Ҳолат аниқлангач, шифохона маъмурияти кузатув камералари орқали аёл шахсини аниқлаган ва ҳуқуқни муҳофаза қилувчи органларга хабар берган.
Самарқанд вилояти Ички ишлар бошқармаси ахборот хизматининг расмий маълумотига кўра, челак ичида топилган чақалоқ тўққиз ойлик, ўғил жинсли бўлган. Мазкур ҳолат юзасидан тегишли ҳужжатлар расмийлаштирилиб, судга оид тиббий экспертиза тайинланган.
Ҳозирда Пайариқ тумани Ички ишлар бўлими ҳузуридаги тергов бўлинмаси томонидан терговга қадар текширув ишлари олиб борилмоқда.
