Маълум қилинишича, Янги Тошкент шаҳри қурилишига 2023 йилда тамал тоши қўйилган бўлиб, лойиҳа учун Юқори ва Ўрта Чирчиқ туманларидан 19 минг 700 гектар ер ажратилган. Концепция Британиянинг “Cросс Works” компанияси томонидан ишлаб чиқилган. Айни пайтда ҳудудда 100 дан ортиқ йирик ва ўрта лойиҳалар амалга оширилмоқда.
Ҳозирга келиб, янги шаҳарда қурилиш майдонлари 3 миллион квадрат метрга етган, бир қатор уй-жой массивлари ва инфратузилма объектлари якуний босқичга кирган. Биринчи босқичда 600 минг аҳоли учун замонавий шароитлар яратилиши, лойиҳа тўлиқ якунлангач эса Янги Тошкент 2 миллион аҳоли истиқомат қиладиган мегаполисга айланиши режалаштирилган.
Ҳудудда ер ости муҳандислик тармоқлари, туннель ва автотураргоҳлар, шунингдек, 10 километрлик соҳил боғи барпо этилмоқда. Президент шаҳарсозликда “яшил” тамойилларни кучайтириш, жамоат транспорти, пиёда ва велосипедчилар учун қулай муҳит яратиш бўйича топшириқлар берди.
Шунингдек, 60 дан ортиқ давлат идоралари учун маъмурий бинолар қурилиши, 2 миллиард долларлик инвестициялар асосида тижорат ва хизмат кўрсатиш объектлари барпо этилиши режалаштирилган. Қурилиш жараёнининг ўзида 10 минг киши иш билан таъминланган.
