Оқўрда матбуот хизмати хабарига кўра, Тўқаев 14–16 ноябрь кунлари амалга оширган давлат ташрифи давомида ўзига ва Қозоғистон делегациясига кўрсатилган юксак эътибор учун Президент Мирзиёевга самимий миннатдорлик билдирган.
Мактубда ташрифнинг тарихий аҳамияти қайд этилиб, у икки давлат ўртасидаги стратегик шериклик ва иттифоқдошлик муносабатларини янги босқичга кўтаргани таъкидланган.
Қозоғистон Президенти, шунингдек, Тошкентда бўлиб ўтган Марказий Осиё давлатлари раҳбарларининг VII Маслаҳат учрашуви юқори даражада ташкил этилганини алоҳида эътироф этган. Унинг таъкидлашича, мазмунли муҳокамалар, муҳим қарор ва ҳужжатлар, шунингдек Озарбайжоннинг тўла ҳуқуқли иштирокчи сифатида қўшилиши форумга стратегик аҳамият берди.
Маълумот учун, Тўқаев 14 ноябрь куни Тошкентга ташриф буюриб, уни аэропортда Президент Мирзиёевнинг ўзи кутиб олган эди.
