CNN хабар беришича, молиялаштириш тўғрисидаги қонун Конгрессдаги узоқ музокаралардан сўнг Республикачилар ва Сенатдаги мўътадил демократлар ўртасидаги келишув асосида қабул қилинган.
Ҳужжат ҳукуматни январгача молиялаштиришни, айрим агентликлар учун эса 2026-молиявий йили охиригача маблағ ажратишни назарда тутади.
Қонун кучга кириши билан “шатдаун” давомида маошсиз қолган давлат хизматчилари ишга қайтди ва тўланмаган ойликлар уларга қоплаб берилди.
Трамп имзо маросимида бу қарорни “Демократлар устидан ғалаба” деб атади ва уларни “шантаж орқали босим ўтказишда” айблади.
“Улар осон йўлни танламади ва энди жуда ёмон кўринишди”, — деди Трамп.
Шу билан бирга, Демократлар партияси қонунни танқид қилиб, “Obamacare” дастуридаги солиқ имтиёзлари тугаши америкаликлар учун тиббий суғурта харажатларини ошириши мумкинлигини таъкидлади.
Спикер Майк Жонсон эса айрим баҳсли моддалар кейинчалик қайта кўриб чиқилишига ваъда берди.
Маълумот учун, “шатдаун” — Конгресс бюджетни ўз вақтида қабул қилмаганида ҳукумат фаолиятининг вақтинча тўхтатилиши ҳисобланади. Бу даврда кўплаб давлат идоралари ёпилади, хизматчилар маошсиз қолади.
2025 йилги “шатдаун” 30 сентябрдан 12 ноябргача, яъни 43 кун давом этди — бу АҚШ тарихидаги энг узоқ танаффус бўлди.
