Бишкекнинг Октябрь туман суди прокуратура талабини қаноатлантирди ва “Темиров Live”, “Клооп.кг” ва “Ayt Ayt Dese” медиа-лойиҳалари материалларини экстремистик деб топди. Бу ҳақда “Кактус.медиа” хабар берди.
Маълум қилинишича, суд қарори билан журналистлар Болот Темиров ва Ринат Тухватшин бошқараётган ушбу оммавий ахборот воситалари ҳамда уларнинг интернет ресурслари фаолияти тақиқланган. Тақиқ нафақат янги материалларни чоп этишга, балки уларнинг саҳифалари ва онлайн платформаларида мавжуд материалларга киришга ҳам тегишли.
“Темиров Live” ва “Ayt Ayt Dese” журналист Болот Темировга алоқадор, “Клооп.кг” эса Ринат Тухватшин асос солган “Клооп Media” фонди лойиҳасидир. Ҳар уч нашр ҳам ўзини Қирғизистонда мустақил ахборот манбаси сифатида кўрсатиб, муқобил истиқболларни тақдим этиб, мамлакатдаги долзарб воқеаларни ёритиб боради.
Қирғизистон Рақамли ривожланиш ва инновацион технологиялар вазирлиги ҳузуридаги Алоқа соҳасини тартибга солиш ва назорат қилиш хизмати юқорида қайд этилган нашрларнинг интернет-ресурсларини блокировка қилишни назарда тутувчи қарорнинг масъул ижрочиси этиб тайинланган.
Журналист Болот Темиров 2023 йилнинг ноябрида Қирғизистондан депортация қилинган ва беш йилга мамлакатга кириши тақиқланган эди. Ринат Тухватшин ҳам хорижда.
2023 йилнинг охирида Қирғизистон Ички ишлар вазирлиги “Ayt Ayt Dese” ва “Темиров Live” саҳифалари мониторинги натижасида оммавий тартибсизликларда иштирок этишга чақириқлар бўлган маълумотлар аниқлангани ҳақида хабар берган эди. Бунга жавобан жиноят иши очилди, 11 журналист ҳибсга олиниб, норозилик намойишлари ва тартибсизликларга қўзғатишда айбланди.
2024 йилнинг октябрь ойида “Темиров Live” ва “Ayt Ayt Dese” режиссёри Муҳаббат Тожибек қизи олти йилга, Азамат Ишенбеков беш йилга, икки журналист эса уч йиллик синов муддатига ҳукм қилинди. Қолган судланувчилар далил йўқлиги сабабли оқланди.
“Клооп.кг” таҳририяти бир неча йиллардан бери расмийлар томонидан босимга дучор бўлмоқда. 2023 йилнинг кузида нашрнинг сайти блокланди, 2024 йилнинг февралида эса суд лойиҳанинг юридик шахси – “Клооп Media” жамоат фондини тугатди.
2025 йилнинг сентябрида нашрнинг тўрт нафар собиқ ходими – икки оператор ва икки ҳисобчи “норозилик уйғотиш ва оммавий тартибсизликлар уюштириш”да айбланган.
