Франциянинг Лангре шаҳрида жойлашган “Дени Дидро маърифат уйи” музейига ҳам ўғри тушди. Бу ҳақда France Info хабар берди.
Маълум қилинишича, 20 октябрь куни эрталаб ишга келган музей ходимлари кириш эшиги бузилганини, олтин ва кумуш тангалар солинган шиша витрина синганини аниқлаган. Жиноятчилар музейга қўйилган тангаларнинг бир қисмини ўғирлаб кетган.
Шунингдек, 1790—1840 йилларда зарб этилган ва 2011 йилда музей биносини реставрация қилиш пайтида топилган тангалар тўплами (1 633 та кумуш ва 319 та олтин) ўғирланган. Уларнинг умумий қиймати 90 минг еврога баҳоланган. Музейнинг бошқа экспонатлари ўз жойида қолган.
Ҳодиса юзасидан ҳуқуқ-тартибот идоралари зудлик билан хабардор қилинган. Ҳозирда музей ходимлари ўғирланган тангалар сонини аниқламоқда.
Лангрдаги музейнинг талон-тарож қилиниши Париждаги Лувр музейини тунаб кетишганидан бир кун ўтиб содир бўлди. Ниқобли жиноятчилар император коллекциясидан тўққизта экспонатни, жумладан, Наполеон ва унинг рафиқаси Жозефинага тегишли заргарлик буюмларини ўғирлаб кетган. Ўғирланган нарсаларнинг умумий қиймати 88 миллион еврога баҳоланмоқда. Жиноятчилар ва қимматбаҳо тақинчоқлар ҳали топилмаган.
Ҳозирча бу серия ортида қандайдир жиноий гуруҳ тургани ёки гап тасодиф жиноятлар ҳақида кетаётгани аниқ эмас. Луврни талон-тарож қилиш ҳолатида терговчилар унинг ортида профессионал уюшган тўда турганини айтмоқда.
