Париждаги машҳур Лувр музейида 19 октябрь куни эрталаб содир бўлган жасоратли ўғирлик тафсилотлари эълон қилинди. Франция Ички ишлар вазирлигига кўра, жиноятчилар музей ходимлари формасида бўлиб, қурилиш крани ёрдамида бинога кирган ва қимматбаҳо буюмларни олиб кетган.
Уч-тўрт кишилик гуруҳ Аполлон галереясида иккита витринани очиб, ичидаги тақинчоқларни олиб чиққан. Улар скутерларда келиб, тезда воқеа жойидан қочиб кетган. Тергов давомида императрица Евгенияга тегишли, 1 354 дона бриллиант ва 56 зумраддан иборат тож музей атрофидан топилган. Мутахассислар бу жиноятни тажрибали ва уюшган жамоа амалга оширганини билдирган.
Бандитизмга қарши кураш полицияси ишни ўз назоратига олди. Ички ишлар вазири Лоран Нунес жиноятчилар чет эллик бўлиши мумкинлигини айтиб, уларни тез орада топишга умид билдирди.
