Ўзбекистондаги Ислом цивилизацияси маркази номидан муаллиф Қудратилла Рафиқовга "Аламим бор" сарлавҳаси остида "Ишонч" газетасида чоп этилган, Ўзбекистон тарихи ва Ислом цивилизацияси маркази очилишига бағишланган чуқур таҳлилий мақоласи учун самимий миннатдорлик билдирамиз.
Бу муҳим асар мазмун жиҳатдан чуқур, юқори даражада профессионал маҳорат билан ёзилган ва юксак маданий қимматга эга. У публицистика эмас, балки тарих ва халқ виждони билан қилинган самимий суҳбатдир. Асар нафақат тадқиқот, балки фикрни жамиятга ёрқин ва ишонарли етказиб бериш маҳорати ва малакаси ҳамдир. Бу эса мақолани юқори интеллектуал даражага кўтаради.
Мақоланинг ҳар бир сатрида йўқотилган имкониятлар учун тўхтовсиз алам, ўтмишдаги бефарқликлар учун изтироб ҳис этилади. Айниқса, муаллифнинг узоқ йиллар давомида буюк ҳукмдор ва мутафаккирларимиз қолдирган улкан меросни жаҳонга кўрсата олмаганимиз ҳақидаги мулоҳазалари ўқувчига кучли таъсир қилади. "Нега? Нега? Нега?.." деган риторик саволлар тарих ва маданиятимиз тақдири ҳақида ўйлаган ҳар бир инсон қалбидаги умумий изтиробнинг ифодасига айланади. Мақола маданий-тарихий меросимизни сақлаш ва ривожлантириш борасида ҳар биримиз зиммамиздаги масъулиятни чуқур англашга ёрдам беради.
Изтиробли ўйлар билан бир қаторда, мақола умид нурлари, Ватанга бўлган чексиз муҳаббат ва унинг келажагига ишонч билан йўғрилган. Шу маънода муаллиф ўз асарида Ўзбекистон Республикаси Президенти Шавкат Мирзиёевнинг тарихий ролини алоҳида таъкидлайди. Давлат раҳбари амалга ошираётган кенг кўламли лойиҳалар миллий онгни мустаҳкамлаш, тарихий хотирани асраб-авайлаш, маърифатпарварлик ва маданий ташаббусларни қўллаб-қувватлаш, шунингдек, Ўзбекистоннинг жаҳон цивилизациясига қўшган бетакрор ҳиссасини халқаро миқёсда равшан ва ишонарли намойиш этишга қаратилган.
Муаллиф таъкидлаганидек, мамлакат Президентининг шахсий ташаббуси ва бевосита кўмаги туфайли Ислом цивилизацияси маркази барпо этилди. У мамлакатнинг маънавий ва маданий уйғонишининг янги ва улуғвор рамзига айланди. Марказ фақат бой тарихимиз, илм-фан ва санъат меросимизни сақлаш ва оммалаштириш билан чекланмай, балки бутун дунёдан олимлар ва тадқиқотчиларни бирлаштиради. Бу эса халқаро илмий ва маданий ҳамкорликка кучли туртки беради.
Мақола Марказни фақат музей ёки илмий майдон сифатида эмас, балки халқ хотирасини сақлайдиган, келажак авлодларга илҳом бағишлайдиган ва халқаро маданий ҳамкорликни мустаҳкамлайдиган тирик платформа сифатида кўришга ёрдам беради. Муаллиф келтирган далиллар Президентимиз ташаббуси билан яратилган Марказнинг аҳамияти ва унинг маърифий миссияси ҳақида кенг жамоатчиликнинг хабардорлигини оширади.
Дарҳақиқат, ушбу бетакрор лойиҳа ўтмиш ва келажакни, анъана ва замонавийликни уйғунлаштиради, илм-фан ва маданият мулоқоти учун янги майдон яратади, замонавий инсоннинг дунёқарашига минг йиллик тарихнинг буюклиги билан юзма-юз келиш имконини беради. Биз яна бир бор давлатимиз раҳбарига халқимиз фахри ва абадий меросига айланадиган бу улкан маданий-маърифий мега-лойиҳани муаллифлик ғояси сифатида илгари сургани ва муваффақият билан амалга оширгани учун миннатдорлик билдирамиз.
Муаллифга бу асар учун, у кўтарган мураккаб, аммо жуда зарур мавзуларга нисбатан самимий муносабати учун чуқур миннатдорчилик изҳор этамиз. Қудратилло Мирсағатовичга янги ғояларга бой янада катта ижодий ютуқларга эришишларини тилаймиз. Ушбу асар кўплаб замондошларимизнинг маънавий уйғониши учун манба бўлиб хизмат қилишига ишонамиз.
Фирдавс Абдухолиқов,
Ўзбекистондаги Ислом цивилизацияси маркази директори
