Умрадан қайтмоқчи бўлган ўзбекистонликларнинг 50 нафари авиачипталарсиз қолиб кетди. Бу ҳақда “Дунё” ахборот агентлиги хабар берди.
Билдирилишича, Саудия Арабистонига умра учун борган ва авиачипта сабаб қийин аҳволда қолган 50 нафар ўзбекистонлик Бош консулхонаси кўмагида ватанга қайтарилди.
Фуқаролардан бири Д.И. ариза билан мурожаат қилиб, сайёҳлик фирмаларидан бири томонидан умра амалларини бажариш учун келган 50 нафар ўзбекистонлик зиёратчилар Маккада ватанга қайтиш учун авиачипталарсиз қолиб кетгани боис, уларни Ўзбекистонга қайтариб юбориш масаласида амалий ёрдам сўраган.
Зиёратчилар умрадан 15 сентябрда қайтиши керак бўлган. Бироқ сайёҳлик фирмаси томонидан зиёратчиларнинг ватанга қайтиб кетмаслик сабаби тушунтирилмаган, фақат яқин кунларда Ўзбекистонга қайтиб кетишлари мумкинлиги айтилган. Зиёратчиларнинг аксарияти кексалар ва аёллар бўлгани туфайли улар ваҳимага тушиб қолган.
Бош консулхона вакиллари сайёҳлик компанияси масъул ходими билан боғланиб, зиёратчиларни хавфсиз ва тез фурсатларда Ўзбекистонга қайтариш масаласини муҳокама қилган. Фирма вакилларига кўра, авиачипталарга масъул ҳамкорлар билан юзага келган баъзи муаммолар боис, зиёратчиларга олдиндан режалаштирилган йўналишга авиачипталарни ўз вақтида сотиб олишнинг имкони бўлмаган.
Вазият Бош консулхона томонидан назоратга олиниб, фирмага зиёратчиларни меҳмонхона билан таъминлаш ҳамда авиачипталар харид қилиш юзасидан тегишли тавсиялар берилган. Барча фуқаролар вақтинча Маккадаги меҳмонхонага жойлаштирилган.
Олиб борилган музокаралар натижасида сайёҳлик фирмаси томонидан зиёратчилар учун авиачипталар харид қилинган ва улар 17 сентябрда Fly Khiva авиакомпаниясининг Мадина— Тошкент йўналишидаги самолёти билан Ўзбекистонга кузатиб қўйилган.
