Пешку туманида ҳоким ёрдамчиси ер сотиб олишда ёрдам бериш эвазига тадбиркордан 6000 доллар талаб қилган. У тезкор тадбирда пора олаётган пайтда қўлга олинди.
Матн: 10 сентябрь куни Бухоро вилояти Пешку туманида яшовчи тадбиркор маҳалла фуқаролар йиғинидаги ҳоким ёрдамчисининг ноқонуний хатти-ҳаракатлари юзасидан мутасадди органларга мурожаат қилган.
Унга кўра, ҳоким ёрдамчиси ўз хизмат мавқеидан фойдаланиб, ҳокимият захирасидаги 7 сотих ер майдонини "К-савдо" ААТ орқали тадбиркорга расмийлаштириб бериш эвазига 6000 АҚШ доллари талаб қилган.
Давлат хавфсизлик хизмати, Бош прокуратура ҳузуридаги Департамент ва ИИО ходимлари ҳамкорлигида ўтказилган тезкор тадбирда ҳоким ёрдамчиси ушбу миқдордаги пулни учинчи шахс орқали олган пайтда ашёвий далиллар билан ушланди.
Ҳозирда унга нисбатан Жиноят кодексининг 210-моддаси 2-қисми "в" банди (тамагирлик) бўйича жиноят иши қўзғатилган. Эҳтиёт чораси сифатида қамоққа олинди. Тергов ҳаракатлари давом этмоқда.
