Россия президенти Владимир Путин 7 октябрь куни 73 ёшни қаршилайди. Кремль матбуот котиби Дмитрий Песков сиёсатчи таваллуд айёмини қандай нишонлашини маълум қилди.
Сиёсатчининг сўзларига кўра, Президент туғилган кунини одатда яқинлари даврасида ўтказади. Аммо кўпинча шахсий байрамини бошқа давлатлар раҳбарлари билан мулоқот тарзида олиб боради.
“Барча инсонлар сингари, у ҳам байрамни яқинлари ва танишлари билан нишонлайди. Бироқ кўп ҳолларда бу хизмат байрамига айланади — у бундай имкониятдан ҳамкасблари, бошқа давлатлар раҳбарлари билан мулоқот қилиш учун фойдаланади”, — дейди Кремль вакили.
Анъанага кўра, Россия президенти 7 октябрь куни МДҲ давлатлари раҳбарлари билан тез-тез учрашувлар ўтказади. Кўплаб чет эл раҳбарлари ҳам қўнғироқ қилиб, уни туғилган куни билан шахсан табриклайди.
Маълумот учун, 2024 йил 7 октябрь куни кечқурун Путин МДҲ етакчилари билан махсус йиғилишда иштирок этган. Президент ёрдамчиси Юрий Ушаковнинг таъкидлашича, бу йиғилиш ўтган йилдаги фаолиятнинг “чўққиси” бўлган.
“Путин ҳеч қачон расман таътилга чиқмайди, чунки президентнинг функциялари тўлақонли дам олиш имкониятини назарда тутмайди”, — дейди Песков.
