Ушбу саволга Тошкент шаҳар ҳокимининг ўринбосари Шароф Раҳмонов жавоб берди:
– Ишонч билан айтишимиз мумкинки, муҳтарам Президентимизнинг Пекинга ташрифи азалдан яқин ҳамкор бўлиб келган икки давлат муносабатлари янги босқичга чиқишида муҳим ўрин тутади. Айниқса, ШҲТ доирасида кенгайтирилган тартибда бўлиб ўтадиган тадбирлар халқаро миқёсда аҳамиятли бўлади. Ўз навбатида, бунга халқаро даражада қизиқиш ҳам юқори бўлмоқда.
Шуни таъкидлаб ўтишим керакки, Тошкент шаҳри ҳокимлиги ушбу олий даражадаги учрашувлар арафасида ХХРнинг қатор вилоятларида бўлиб, Пекин, Шанхай, Чэнду, Хэфей ва бошқа кўплаб шаҳарлар билан жуда яқин ҳамкорлик ўрнатди.
Мазкур ҳудудларда шериклик шартномалари, йўл хариталари, ривожлантириш, ҳар томонлама ҳамкорликни мустаҳкамлаш бўйича чора-тадбирлар режалари имзоланди.
Ташриф доирасида Ўзбекистон-Хитой бизнес-форуми бўлиб ўтди. Бу тадбирга хитойлик тадбиркорлар катта қизиқиш билдирди ва унда фаол иштирок этди. Бу уларнинг бизнинг бозорга кириш истагидан далолатдир. Бунинг далили шундаки, биз, Тошкент шаҳар ҳокимлиги томонидан мазкур бизнес-форум доирасида умумий қиймати қарийб 4 миллиард АҚШ долларига тенг сармоявий битим ва шартномалар имзоланди.
Савдо-кўнгилочар мажмуалари, меҳмонхона мажмуалари қурилиши соҳасида сармоявий лойиҳаларни амалга оширишни режалаштираётган Хитой компаниялари билан имзоланган келишувни алоҳида таъкидлаб ўтиш жоиз. Айниқса, шаҳримиз учун муҳим лойиҳалар бўлган инфратузилма лойиҳалари амалга оширилади. Бу, хусусан, дренаж тизимини реконструкция қилиш ва модернизация қилиш, йўл ўтказгичлар қурилишини реконструкция қилиш, автомобиль йўллари ва, умуман, транспорт инфратузилмасини реконструкция қилиш лойиҳаларини ўз ичига олади.
Тошкент шаҳар электр тармоғи учун янги подстанциялар қуриш лойиҳасини ҳам алоҳида таъкидлаб ўтмоқчиман. Биринчи босқичда олтита янги подстанция қуриш, кейинчалик кенгайтириш, шунингдек, Тошкент шаҳрида 200 мегаватт қувватга эга қувватлантириш станциясини яратиш лойиҳасини амалга ошириш режалаштирилган.
Бундан ташқари, икки томонлама инвестиция битимлари пакетига Тошкент шаҳрининг бир қисмида “Диснейлендлар” деб аталадиган йирик кўнгилочар боғлар, аквапарклар қуриш лойиҳаларини амалга оширишни кўзда тутувчи инвестиция лойиҳалари киритилган. Бу, нафақат халқимиз манфаатларига хизмат қилади, балки пойтахтга хорижий сайёҳларнинг оқимини кўпайтиради.
