Жорий йилнинг 26–27 август кунлари Ўзбекистонда расмий ташриф билан бўлган Япония Ташқи ишлар вазири Такеси Ивая 27-август куни Тошкентда ўзбекистонлик ҳамкори Бахтиёр Саидов билан стратегик мулоқот шаклидаги илк учрашувни ўтказди.
Йиғилишда сиёсат, хавфсизлик, иқтисодиёт, инновация, таълим, соғлиқни сақлаш, энергетика, транспорт-логистика, маданият ва инсонлар ўртасидаги алоқалар каби қатор йўналишларда узоқ муддатли ва ўзаро фойдали ҳамкорликни кенгайтириш масалалари муҳокама қилинди.
Баёнотда қайд этилишича, икки томон инвестициявий шерикликни мустаҳкамлашга, япон технологияларини Ўзбекистонга жорий этишга ва савдо-иқтисодий алоқаларни диверсификация қилишга тайёрлигини билдирди.
Вазирлар, шунингдек, халқаро ташкилотлар доирасидаги ҳамкорликни кучайтириш, хусусан, БМТ Хавфсизлик Кенгашини кенгайтириш бўйича ўзаро қўллаб-қувватлашни таъкидлаган. Мулоқот доирасида “C5+1” шакли ҳам самарали минтақавий платформа сифатида эътироф этилган.
Такеси Ивая ташриф давомида Президент Шавкат Мирзиёев билан учрашди ва Япония Бош вазири Сигеру Исибанинг саломи ҳамда Мустақиллик куни муносабати билан йўллаган табригини етказди.
Стратегик мулоқот йиғилишлари икки йилда бир маротаба навбатма-навбат Тошкент ва Токиода ўтказилиши режалаштирилмоқда.
