Республика бўйича 2025 йилнинг биринчи ярим йиллигида 68 та янги мактаб ишга тушган бўлса, уларнинг бирортаси Тошкент шаҳрига тўғри келмайди. Бу ҳақда Давлат статистика қўмитаси маълумот берди.
Шу билан бирга, 2024/2025 ўқув йилида 738 минг бола 1-синфга боради. 455,2 минг ўқувчи мактабни битиргани ҳисобга олинса, умумий ўқувчилар сони қарийб 283 минг нафарга кўпайиши кутилмоқда. Бу эса, аввало, катта шаҳарларда, жумладан Тошкентда мактаб жойларига бўлган талаб янада ошиб боришини англатади.
Расмий маълумотларга кўра, 2 йил аввал мактабларнинг 75,5 фоизи 2 ёки 3 сменада фаолият юритган. Мактаблар вазирлиги эса мактаб сиғими ёки сменалар бўйича янгиланган маълумотларни эълон қилмаган.
Шу билан бирга, охирги бир йил ичида Тошкент аҳолиси яна 70 минг нафарга кўпайди. Аммо аҳоли ўсишига нисбатан мактаб инфратузилмаси секин суръатда ривожланмоқда.
Мутасаддиларнинг бу муаммони “хусусий мактаблар ҳал қилади” деган ёндашуви эса амалиётда етарли натижа бермаяпти.
