Россия президенти Владимир Путин Шимолий Корея раҳбари Ким Чен Инга йўллаган мактубида Украинада Россия сафида жанг қилган кореялик аскарларни “қаҳрамон” деб атади. Бу ҳақда КХДР давлат агентлиги хабар берди.
Путин ушбу мактубни Кореянинг Япония мустамлакасидан озод этилган кун муносабати билан йўллаган. Унда Путин тарихда Совет армияси ва шимолий кореяликлар Японияга қарши бирга жанг қилганини эслатиб ўтди ҳамда “бугунги ҳамкорлик ҳам ана шу дўстлик ришталарига асосланганини” таъкидлади.
Путиннинг таъкидлашича, КХДР аскарлари 2024 йилда Россиянинг Курск вилоятидаги “украин босқинчиларидан” ҳудудни озод этиш операциясида фаол қатнашган. Россия томони маълум қилишича, 10 мингдан ортиқ шимолий кореялик ҳарбий Украина фронтига юборилган, улар орасида юзлаб қурбонлар бор.
Мактубни Россия Давлат Думаси раиси Вячеслав Володин Ким Чен Инга шахсан етказган. Володин сўзларига кўра, Россия ўз юрти учун жонини фидо қилган Корея аскарларини ҳеч қачон унутмайди.
