Жорий йилнинг 29 июль куни Хоразм вилояти Хива туманидаги хусусий мактабгача таълим муассасаларидан бирида муассаса раҳбари болани жароҳатлади. Бу ҳақда вилоят Мактабгача ва мактаб таълими бошқармаси хабар берди.
Хизмат текшируви давомида аниқланишича, мазкур муассасада раҳбар лавозимида ишлаб келаётган Ж.М. тайёрлов гуруҳига рус тили фанидан қатнашиб юрган У.Ш.ни шеърни ёдлаб келмагани учун чап елка соҳасини қўли билан қаттиқ сиқиб, тан жароҳати етказган.
Ҳолат юзасидан боланинг яқинлари томонидан Хива тумани Ички ишлар бўлимига мурожаат қилинган ва мазкур ҳолат Хива туман ИИБ бошлиғининг биринчи ўринбосари иштирокида муҳокама қилинган. Айни пайтда Хива туман ИИБ ходимлари томонидан ҳолат юзасидан терговгача текширув ҳаракатлари олиб борилмоқда.
“Мазкур воқеа бўйича тегишли ҳуқуқий баҳо бериш, бола ҳуқуқлари ва хавфсизлигини таъминлаш юзасидан барча зарур чоралар кўрилаётганини маълум қиламиз. Мактабгача таълим муассасаларида болаларга нисбатан ҳар қандай зўравонлик ҳолатларига мутлақо йўл қўйилмаслиги қатъий назоратга олинган бўлиб, бу борада мутасадди ташкилотлар билан ҳамкорликда чора-тадбирлар амалга оширилмоқда”, дейилади хабарда.
