АҚШ президенти Дональд Трамп 1 августдан Ҳиндистондан импорт қилинадиган маҳсулотларга 25 фоизлик бож жорий қилинишини, шунингдек, Деҳлини Россия билан қурол ва энергетика савдоси учун қўшимча “жарима” кутаётганини эълон қилди.
Трамп Ҳиндистоннинг Россиядан қурол ва нефть харид қилишини танқид қилар экан, “барча Украина урушини тўхтатишни истаётганда бу нотўғри” дея баёнот берди. АҚШ Ҳиндистон билан савдо келишувига эришишни истаса-да, асосий келишмовчиликлар қишлоқ хўжалиги ва ички бозорни ҳимоя қилишда давом этмоқда.
Ҳиндистон ҳукумати Трамп баёнотига жавобан миллий манфаатлар, фермерлар ва кичик бизнес манфаатларини ҳимоя қилишда қатъийлигини билдирди. Расмийлар музокаралар “муваффақиятли давом этмоқда” дея оптимистик кайфиятда қолмоқда.
