Ўзбекистондаги Ислом цивилизацияси маркази делегацияси Кувайтдаги “Ислом мерослари уйи” (House of Islamic Antiquities) ва “Ториқ Ражаб музейи”га илмий-ижодий сафар қилди. Бу ҳақда Ўзбекистондаги Ислом цивилизацияси маркази ахборот хизмати хабар берди.
“Ислом мерослари уйи”да бўлиб ўтган учрашувда музей кўргазмалари координатори Др. Ҳадийл Халил Рашад билан музокаралар ўтказилди. Суҳбат давомида жорий йил март ойидаги ташриф чоғида келишилган масалалар муҳокама қилинди. Жумладан, 2025 йилда Ислом цивилизацияси маркази очилиши арафасида ташкил этиладиган “Ўзбекистон маданий мероси – бутун инсоният мероси” халқаро глобал кўргазмаси доирасида Бобурийлар даврига оид ноёб ёқут тошларни намойиш этиш масалалари келишиб олинди.
Кўргазма экспонатлари учун жаҳон музей стандартларига жавоб берадиган махсус витриналар тайёрланаётгани таъкидланди. Бу жараёнда Италиянинг Goppion ҳамда Германиянинг Glasbau Hahn каби нуфузли компаниялар иштирок этмоқда.
Учрашувда шунингдек, қўлга киритилаётган артефактларни транспортировка, қадоқлаш ва вақтинчалик сақлаш тартиблари, Марказ биносида хорижий экспонатлар учун яратилаётган шарт-шароитлар муҳокама қилинди. Музокаралар якунида Кувайт томони ноёб ёқут тошларни Ўзбекистонга олиб келиш билан боғлиқ ишларини тўлиқ ўз зиммасига олишини маълум қилди.
Куннинг иккинчи ярмида марказ делегацияси “Ториқ Ражаб музейи” директори Зияд Ражаб ва унинг синглиси Нур Ражаб билан учрашди. Суҳбат чоғида Ислом цивилизацияси маркази очилишига оид тайёргарлик ишлари, музейда сақланаётган Ўзбекистон тарихига оид артефактлар тўғрисидаги китоб-альбом тайёрлаш масалалари муҳокама қилинди. Зияд Ражаб халқаро кўргазма учун экспонатлар танлаб қўйилганини ва яқин кунларда расмий тақдим этилишини билдирди.
Кувайтга сафар натижаларига кўра, мамлакатдаги 2 та музей ва 1 та хусусий коллекция Ислом цивилизацияси маркази очилиши арафасида ташкил этиладиган глобал халқаро кўргазмада фаол иштирок этади. Кувайт томонидан Ўзбекистонга борадиган барча экспонатларнинг суғурта, қадоқлаш ва ташиш ишлари мувофиқлаштирилиши келишиб олинди.
