Ўзбекистон фуқаролари учун республикада дипломатик ваколатхоналари бўлмаган мамлакатларга визаларни расмийлаштириш тартиби соддалаштирилиши мумкин. Ташқи ишлар вазирлигида VFS Global компанияси билан шу масала муҳокама қилинди.
ТИВ компаниянинг МДҲ ва Шарқий Европа мамлакатлари бўйича минтақавий директори Ш. Мишра ва Ўзбекистондаги ваколатхонаси раҳбари T.Tўйчиев билан учрашув ўтказди. Унда мамлакат ҳудудларида VFS Global офислари тармоғини кенгайтириш истиқболлари муҳокама қилинди.
Томонлар жамоавий гуруҳларнинг аризалари бўйича компания ходимларининг сайёр қабуллари механизмини ишга туширишга келишиб олди. Ушбу хизмат шакли пулли асосда кўрсатилади ҳамда чекка ҳудудлардаги ариза берувчиларга Тошкент ва Самарқанд шаҳарларидаги марказларга ташриф буюрмасдан виза ёрдамини олиш имконини беради.
Шунингдек, ўзбекистонликлар учун республикада дипломатик ваколатхонаси мавжуд бўлмаган давлатлар, жумладан, Канада, Аргентина, Австралия ва бошқаларга визаларни расмийлаштириш тартиб-таомилларини соддалаштиришга алоҳида эътибор қаратилди.
ТИВнинг таъкидлашича, аккредитациядан ўтган консулликлар мавжуд бўлмаган шароитда визани расмийлаштириш қўшимча вақт ва молиявий харажатларни талаб қилади. Шу муносабат билан Ўзбекистон томони жараёнларнинг бир қисмини мамлакат ҳудудига кўчиришга, жумладан, VFS Global’нинг маҳаллий офислари орқали биометрик маълумотларни топшириш ва онлайн суҳбат ўтказиш имкониятини кўриб чиқишни таклиф этди.
Томонлар ҳамкорликни кенгайтириш, қўшма ташаббусларни амалга ошириш ва Ўзбекистон фуқаролари учун виза хизматлари сифатини оширишдан манфаатдор эканини тасдиқлади.
VFS Global — ҳукуматлар ва дипломатик ваколатхоналар учун виза, паспорт ва консуллик хизматларини бажаришда маъмурий қўллаб-қувватлашни олиб берадиган хусусий аутсорсинг компанияси.
Унинг асосий фаолият йўналишларига қуйидагилар киради: ариза ҳужжатларини қабул қилиш ва текшириш, учрашувлар (appointment) ташкил этиш, биометрик маълумотларни йиғиш, ҳужжатларни консуллик ёки элчихоналарга йўллаш ва ариза натижасини тақдим этиш. Виза ва услубий қарорларни аниқлаш ўша давлатлар томонидан амалга оширилади — VFS Global бу жараённи соддалаштиради.
