Шавкат Мирзиёев 7 июль куни Жиззах вилояти туманларида амалга оширилаётган ишлар, аҳолини ўйлантираётган муаммолар ечими билан танишди. Бу ҳақда Президент матбуот хизмати хабар қилди.
Давлат раҳбарининг ўтган йил 31 декабрдаги қарори билан вилоятни ривожлантириш чора-тадбирлари белгилаб берилган. Хусусан, 2025 йилда 2 миллиард доллар сармоя жалб этиш, экспортни 285 миллион долларга етказиш, 168 минг кишини иш билан таъминлаш режалаштирилган.
Бу вазифалар бирин-кетин бажарилмоқда, дейилади хабарда. Вилоятда ўтган олти ойда саноат, хизмат кўрсатиш ва қишлоқ хўжалиги соҳаларида 200 та лойиҳа амалга оширилди. Инвестициялар оқими 662 миллион долларни ташкил этди.
Бироқ Дўстлик, Зафаробод, Пахтакор ва Мирзачўл туманлари умумий ҳудудий ўсиш суръатларидан сезиларли даражада орқада қолмоқда. Шу муносабат билан президент иш ўринлари яратиш учун янги лойиҳаларни, биринчи навбатда, мазкур туманларда жойлаштириш зарурлигини таъкидлади.
Сўнгги ойларда вилоятда умумий қиймати 250 миллион долларлик йирик туристик мажмуалар ишга туширилди ва бу сайёҳлар оқимини икки баробарга оширди. "Буни янада ошириш учун ҳамма шароит бор", — дейилади хабарда.
Яна бир имконият — ер. Вилоятда 1,3 миллион гектар қишлоқ хўжалиги ерлари бўлса-да, унинг 40 фоизигина экинлар учун ишлатилади. Қолаверса, ҳар гектар ердан ўртача даромад бошқа ҳудудларга нисбатан паст. Ердан оқилона фойдаланган ҳолда чорва учун озиқ-овқат ва озуқа ишлаб чиқаришни сезиларли даражада ошириш мумкин, дейилади йиғилишда.
Жиззах вилоятида, шунингдек, давлат органлари вакиллари, соҳа мутахассислари, етакчи тадбиркорлардан иборат "Ислоҳотлар штаби" ташкил этилди.
Йиғилишда штаб томонидан тайёрланган янги лойиҳалар тўплами тақдим этилди. Режага кўра, умумий қиймати 520 миллион доллар бўлган 200 та лойиҳа амалга оширилиши кўзда тутилган. Уларнинг амалга оширилиши 12 минг иш ўрни яратиш, бюджетга 120 миллиард сўм қўшимча даромад олиш, 100 миллион долларлик экспорт салоҳиятига эришиш имконини беради.
Давлат раҳбари лойиҳаларнинг иқтисодий мақсадга мувофиқлиги ва бозор талаби билан қизиқди. Саноат, қишлоқ хўжалиги, туризм ва хизмат кўрсатиш соҳаларида сифат сакрашига эришиш учун ҳокимлар ва штаблар ҳамжиҳатликда иш олиб бориши зарурлигини таъкидлади.
"Шунда Жиззах вилояти инвестиция, иш ўрни, аҳоли даромади ва экспорт энг тез ўсаётган ҳудудлардан бирига айланади", — дейилади йиғилишда.
