Ижтимоий тармоқларда махсус кийим кийган шахслар ўзларини ФВВ ходимлари сифатида таништириб, аҳолидан гўёки ёнғин хавфсизлиги қоидаларини бузганликлари учун пул тўлашга мажбурлаётгани акс этган видеолар тарқалмоқда. Фавқулодда вазиятлар вазирлиги мазкур ҳолат юзасидан мазкур шахсларнинг вазирлик фаолиятига ҳеч қандай алоқаси йўқлигини, шу билан бирга, ёнғинларнинг олдини олиш билан боғлиқ тадбирлар учун вазирлик тизими ходимлари томонидан ҳеч қандай пул йиғимлари, бошқа турдаги тўловлар ундирилмаслигини маълум қилди.
Шу муносабат билан Ўзбекистон Фавқулодда вазиятлар вазирлиги фуқаролардан бу борада қуйидагиларга эътибор қаратишни сўради:
"Хонадонингизга келиб, ўзини Фавқулодда вазиятлар вазирлиги тузилмаларига ўхшаш номлар билан таништирган шахслардан, биринчи навбатда, шахсини тасдиқловчи хизмат гувоҳномасини тақдим этишини сўранг. Уларнинг фаолият тури ҳамда қандай хизматлар кўрсатиши ва ишларни бажаришларига аниқлик киритинг. Улар томонидан таклиф қилинадиган хизматларни бажариш фақат сизнинг розилигингиз асосида амалга оширилиши мумкинлигини унутманг. Агар фавқулодда вазиятлардан муҳофаза қилиш юзасидан бирор ишни бажармасдан, сиздан мажбурий тартибда тўлов талаб қилинса, ўз ҳуқуқларингизни ҳимоя қилиш мақсадида ҳуқуқни муҳофаза қилувчи органларга мурожаат этишингиз ёки Фавқулодда вазиятлар вазирлигининг экранда кўрсатилган 95 772-10-50 ишонч рақамига мурожаат қилишингиз мумкин", дейилади мурожаатда.
