Наманган вилоятида қалбаки валюта муомаласига оид жиноий схема фош этилди. Бу ҳақда ДХХ Darakchi.uz'га маълум қилди.
Қайд этилишича, “Косонсой туман йўллардан фойдаланиш” унитар корхонаси ишчиси қалбаки 20 минг АҚШ долларини 14 минг ҳақиқий долларга сотишни таклиф қилган. У ДХХ ва Иқтисодий жиноятларга қарши департамент томонидан ўтказилган тезкор тадбирда, 8 минг қалбаки долларни харидорга топшираётган пайтда қўлга олинган.
Текширув давомида у мазкур сохта валютани 1985 йилда туғилган Косонсой туманида яшовчи шахсдан олгани маълум бўлди. Унинг ҳузуридан яна 6 минг қалбаки доллар аниқланиб, расмийлаштириб олинди. Тергов яна бир манбани фош этди: ушбу валюта ўз навбатида 1992 йилда туғилган яна бир фуқародан келгани аниқланган.
Барча гумонланувчиларга нисбатан Жиноят кодексининг 176-моддаси 3-қисми “а” банди асосида иш қўзғатилиб, қамоққа олиш эҳтиёт чораси қўлланган.
Ҳозирда тергов ҳаракатлари давом этмоқда.
