Мамлакатимиз дипломатлари саъй-ҳаракати билан Ўмонда оғир ҳаётий вазиятга тушиб қолган ҳамюртимизнинг Ўзбекистонга қайтиши таъминланди, деб хабар қилмоқда "Дунё" АА.
Ўзбекистон элчихонаси маълумотига кўра, Ўмонда оғир ҳаётий вазиятга тушиб қолган юртдошимиз И.С. мурожаат қилиб, икки нафар вояга етмаган фарзанди билан юртимизга қайтишида ёрдам сўраб мурожаат қилган.
Мурожаатда қайд этилишича, у 2019 йилдан буён Ўмоннинг ал-Бурейми шаҳрида, асли келиб чиқиши эронлик бўлган, лекин ҳеч бир давлат фуқаролигига эга бўлмаган, Али исмли шахс билан шаръий никоҳ асосида бирга яшаб келган. И.С. шаръий эридан 2020 йилда ва 2022 йилда фарзандларни дунёга келтирган. Оила бошлиғининг ҳеч қандай ҳужжатга эга эмаслиги ва қонуний никоҳ шартномасининг йўқлиги сабабли фарзандларга туғилганлик ҳақидаги гувоҳномаларни расмийлаштириш ҳам йиллар давомида ортга сурилиб келган.
Шунингдек, оиладаги келишмовчилик, ноқонуний эрнинг фарзандларга нисбатан тез-тез куч ишлатиш ҳолатлари ва уларни ал-Бурейми шаҳридаги хонадонда тутқинликда сақлаш ҳолатлари аёлнинг Ўзбекистон элчихонасига ёрдам сўраб ариза ёзишга ундади.
Аризада қайд этилган ҳолатлар батафсил ўрганилганидан сўнг, жорий йил 19 май куни элчихона ходимлари ал-Бурейми шаҳридаги И.С. ушлаб турилган хонадонга ташриф буюришди. Дипломатлар кўмагида она ва унинг икки нафар вояга етмаган болалар Масқат шаҳрига олиб келинди ҳамда вақтинча яшаш учун жой билан таъминланди.
Шундан сўнг, элчихона консуллик бўлими томонидан Ўмон тегишли давлат идораларига мурожаатлар қилиниб, И.С.нинг вояга етмаган фарзандларига туғилганлик ҳақидаги ва Ватанга қайтиш учун гувоҳномалар расмийлаштирилди. "Ватандошлар" жамоат фонди ва Ўзбекистон Миграция агентлиги ҳамда Масқатдаги фаол ватандошимиз кўмагида мазкур оиланинг Ўзбекистонга қайтиши учун авиачипталар харид қилинди.
Мазкур оила жорий йил 18 июнь куни Масқат шаҳридаги халқаро аэропортдан Ўзбекистонга кузатиб қўйилди.
