“Олот-Тошкент” йўналишидаги йўловчи поездда вагон хизматчисининг қўшмачилик қилгани аниқланди. Унга қилмиши учун 2 йил ахлоқ тузатиш ишлари жазоси тайинланди. darakchi.uz суд ҳужжати билан танишди.
Ҳужжатга кўра, “Ўзтемирйўлйўловчи” АЖда вагонлар хизматчиси вазифасида ишлаб келган Д.Х. жорий йилнинг 21 февраль куни 071 рақамли “Олот-Тошкент” йўналишида ҳаракатланувчи йўловчи поезднинг 7-вагонида кузатувчи вазифасида бўлган. У қўшмачилик қилиш мақсадида шу куни соат 20:15 ларда “Қоракўл” темирйўл вокзалидан поезднинг 11-вагонига чипта билан чиқиш учун келган Б.Ў. ва Г.Ў.ни 7-вагоннинг 2-купесига жойлаштириб, моддий манфаат кўриш мақсадида Б.Ў.дан тезкор тадбирда фойдаланилган 300 минг сўмни олган. Бунинг эвазига у Б.Ў. ва Г.Ў.га жинсий алоқада бўлиши учун шароит яратиб бериб, қўшмачилик қилган.
Ҳолат Навоий вилояти Транспортда хавфсизликни таъминлаш бошқармаси жиноят қидирув гуруҳи ходимлари томонидан аниқланиб, 300 минг сўм пуллар холислар иштирокида ашёвий далил сифатида олинган.
Жорий йилнинг 15 апрель куни жиноят ишлари бўйича Қизилтепа туман судида мазкур иш кўриб чиқилган. Судда Д.Х. айбига тўлиқ иқрор бўлган. Шу тариқа у Жиноят кодексининг 131-моддаси (Қўшмачилик қилиш ёки фоҳишахона сақлаш) 1-қисмида назарда тутилган жиноятни содир қилганликда айбдор деб топилиб, 1 йил 6 ой муддатга “Ўзбекистон темир йўллари” АЖ тизимидаги корхона ва ташкилотларда мансабдорлик ҳамда моддий жавобгарлик лавозимларида ишлаш ҳуқуқидан маҳрум қилинган. Шунингдек, унга ойлик иш ҳақининг 20 фоизини давлат даромади ҳисобига ушлаб қолган ҳолда 2 йил ахлоқ тузатиш ишлари жазоси тайинланган.
