Шимолий Атлантика альянси — НАТО бу йилги саммит дастурини анъанавий уч сессиядан фақат бир сессияга қисқартирди. Гап, АҚШ президенти Доналд Трампнинг сабрсизлиги ва кутилмаган ҳаракатларидан эҳтиёт бўлишда. Бу ҳақда “The Financial Times” нашри хабар берди.
Маълумотларга кўра, Голландиянинг Гаага шаҳрида бўлиб ўтадиган саммитда ишчи сессия атиги 2,5 соат давом этади. Бу қарор Трампнинг йиғилиш давомида зерикиб, уни эрта тарк этмаслиги учун қабул қилинган.
“Бу чора Трамп зерикмасин ва саммитни ўртасида тарк этмасин деган мақсадда кўрилган”, — деб ёзади ФТ.
Эслатиб ўтамиз, жорий йилги “G7”саммитида Трамп тадбирни муддатидан олдин тарк этиб, бошқа давлат раҳбарларини ижтимоий тармоқларда танқид қилган эди. НАТО расмийлари бу сафар бундай ҳолатга йўл қўймасликка уринмоқда.
НАТО Бош котиби Марк Рютте саммитда фақат битта муҳим масалага эътиборни жамлаш тарафдори — бу ҳарбий харажатларни 2030 йилгача ЯИМнинг 5 фоизигача ошириш таклифи. Ҳозирча бу режаларга Испания ва яна бир нечта давлат қаршилик қилмоқда. Испания ҳукумати мудофаа харажатларининг ортиши ижтимоий таъминотга салбий таъсир кўрсатишидан хавотирда.
Саммит 24–26 июнь кунлари Гаагада бўлиб ўтади. Тадбирда Украина Президенти Владимир Зеленский иштирок этиши ҳам кутилмоқда.
