Учрашув чоғида томонлар яқинда Украина хавфсизлик хизмати (СБУ) томонидан амалга оширилган “Тўр” операцияси доирасидаги воқеаларни муҳокама қилган.
Трамп ўзининг Truth Social тармоғида ёзишича, суҳбат 1 соат 15 дақиқа давом этган ва “яхши” ўтган, бироқ ҳали “зудлик билан тинчликка олиб келувчи” даражада бўлмаган.
“Президент Путин аэродромларга қилинган ҳужумга жавобан чоралар кўришга мажбур бўлишини қатъий айтди”, — дейди Трамп.
Шунингдек, етакчилар Эрон ва АҚШ ўртасидаги ядровий битимни ҳам муҳокама қилган. Трампнинг сўзларига кўра, у Путин билан Эроннинг ядровий қуролга эга бўлмаслиги кераклиги борасида якдил фикрга келган.
“Мен президент Путинга Эронда ядровий қурол бўлиши мумкин эмаслигини айтдим. У эса бу масала бўйича Эрон билан музокараларга қўшилиш ва жараённи тезроқ ҳал этишда кўмаклашишга тайёрлигини билдирди”, — дея қайд этди Трамп.
