Қирғизистонда Жогорку Кенеш депутатларига вақтинча чет эл ва ички хизмат сафарларига чиқиш тақиқланди. Бу ҳақда спикер Нурланбек Турғунбек уулу маълум қилди.
Унинг билдиришича, сессия тугашига атиги олтита йиғилиш қолган.
“Кейин икки ойлик таътил бўлади: бир ой сайловчилар билан учрашувлар, яна бир ойлик таътил. Шунинг учун ҳурматли депутатлар, айниқса, фракция ва депутатлик гуруҳлари раҳбарлари, қўмита раислари барча хорижий ва маҳаллий хизмат сафарларини бекор қилинг, ҳаттоки харажатлар таклиф қилган партия томонидан тўланган бўлса ҳам. Ҳеч кимга рухсат берилмайди. Хафа бўлманг. Бизда жуда муҳим қонун лойиҳалари бор, кворум бўлиши керак”, дейди Турғунбек уулу.
Қайд этилишича, Қирғизистонда парламент мажлиси жорий йилнинг 26 июнь куни якунланади.
Маълумот учун, кворум – йиғилиш, мажлис қатнашчиларининг қонуний ҳуқуққа, ҳуқуқий кучга, ваколатга эга бўлган, қарорлар қабул қилиш учун қонунда ёхуд жамоат ташкилотларининг уставларида белгиланган зарур сони.
