Netflix компанияси “Темурланг. Сўнгги жаҳонгирнинг юксалиши” (Tamerlane: Rise of thе last Conqueror) номли фильмни суратга олиш ишларини якунлади. 2022 йил охирида бошланган ушбу лойиҳа Амир Темур ҳаётига бағишланган бўлиб, суратга олиш жараёнлари Ўзбекистон ва Қозоғистонда бўлиб ўтган.
“Фильмда Амир Темурнинг ҳокимият тепасига келиши ҳамда у қолдирган мерос ҳақида ҳикоя қилинади. Суратга олиш жараёнининг маркази Ўзбекистон бўлди. Биз минтақадаги энг муҳим тарихий шахслардан бирининг кинотасвирини айнан у яшаган ва жанг қилган ҳудудларда яратдик. Бу суратга олиш жараёни биз учун жуда қадрли бўлди”, дейди лойиҳа муаллифлари.
Суратга олиш гуруҳига Ўзбекистон, Қозоғистон ва АҚШдан мутахассислар жалб этилган. Режиссёр — Жейкоб Шварц, сценарий муаллифи — Метю Грин. Амир Темур ролини Кристиан Мортенсен, Амир Ҳусайннинг рақибини Маҳеш Жаду, Алжайнинг рафиқасини эса ўзбек актрисаси Юлдуз Ражабова ижро этган.
Каскадёрлар гуруҳини афсонавий Nomad Stunts жамоаси бошқарган — улар ёрдамида отлиқлар ҳужуми ва от жанглари саҳналарини жонлантиришга муваффақ бўлишди.
“Биз ўзбекистонлик тарихчилар ва олимлар билан яқиндан ҳамкорлик қилиб, жамоамиз билан Марказий Осиёнинг улуғворлигини ўша даврга оид декорациялар, гўзал либослар билан кўрсатишга ҳаракат қилдик”, дейди лойиҳа ижодий гуруҳ аъзолари.
Фильмни суратга олиш ишлари ўтган йилнинг кузида якунланган бўлиб, ҳозирда у пост-продакшн босқичига ўтган. Тахминларга кўра, премера жорий йил ёз охирида бўлиб ўтади.
