АҚШ собиқ президенти Жо Байденга простата саратонининг агрессив шакли ташхиси қўйилган бўлиб, унинг 12 ойдан 18 ойгача умри қолган бўлиши мумкин. Бу ҳақда Оқ уйнинг собиқ шифокори, республикачи конгрессмен Ронни Жексон маълум қилди.
Ўзи нима бўлган эди?
Байденнинг матбуот котиби жорий йилнинг 18 май куни Байден чалинган ташхисни ҳақиқат эканлигини тасдиқлади ва касалликни даволаш мумкинлигини таъкидлади.
Бироқ Жексоннинг сўзларига кўра, муваффақиятли даволанишга умид қилинса-да, прогнозлар ташвишли бўлиб қолмоқда.
“Бу менинг мутахассислигим эмас, лекин бу маълум бўлганидан бери кўплаб урологлар билан суҳбатлашдим ва уларнинг барчаси унинг 12 ойдан 18 ойгача умри қолиши мумкинлиги ҳақида бир фикрга келишди. Умид қиламанки, вақт кўпроқ бўлади ва ишонаманки, улар бу касалликни самарали даволай олади. У ҳали кўп йиллар яшайди. Лекин бу жуда илгарилаб кетган касаллик”, — дейди Ронни Жексон.
Байден қачондан касаллик билан курашарди?
Аввалроқ онколог Эзекиэл Эмануэл касалликнинг ривожланиши Байденнинг 2021 йилдаги президентлик муддати бошидаёқ бошланган бўлиши мумкинлигини тахмин қилганди.
Ушбу баёнотлар сиёсатчининг ҳақиқий соғлиғи яширилган бўлиши мумкинлиги ҳақидаги жамоатчилик шубҳаларини кучайтирди. Айниқса, Оқ уйнинг 2024 йил февраль ойидаги тиббий ҳисоботида простата безида ҳеч қандай муаммо йўқлиги, аксинча, Байденнинг соғлиғи “яхши” экани таъкидлангани эътиборга молик.
Маълумот учун, Оқ уйнинг собиқ раҳбари ҳозир 82 ёшда. 2024 йилда у тез-тез адашиб гапириши, унутувчанлиги ва омма олдида йиқилишлари туфайли жисмоний ва ақлий ҳолатига шубҳалар ортиб бораётган бир пайтда президентлик пойгасидан чиқишга мажбур бўлди.
