Жорий йилнинг 16 май куни Тошкент шаҳрида “Халқлар дўстлиги” ва “Пахтакор” метро бекатлари оралиғида қиз боланинг белидан паст қисмига тегиниб, унга шилқимлик қилган йигит беш суткага қамалди. darakchi.uz суд қарори билан танишди.
Кеча, 20 май куни жиноят ишлари бўйича Шайхонтоҳур туман судида мазкур иш кўриб чиқилган.
Суд ҳужжатига кўра, 16 май куни соат 10:10 ларда 2006 йилда туғилган С.Б. “Пахтакор” бекатидан “Халқлар дўстлиги” бекатига кетаётган вақтида Ш.А.га нисбатан шаҳвоний шилқимлик қилган. Суд мажлисида Ш.А. кўрсатма бериб, метро вагонига чиққан вақтида шахси унга кейинчалик маълум бўлган С.Б. унинг белдан паст қисмига қўли билан урилиб кетганини, дастлаб буни эҳтиётсизлик сабаб деб ўйлаганини, сўнг С.Б. яна уни белидан пастки қисмидан ушлаб олиб, шилқимлик қилганини, шундан сўнг уни ИИБ ходимларига топширганини билдирган.
Судланувчи С.Б. айбига иқрор бўлган ва Ш.А.га нисбатан тегажоғлик қилиб, унинг белидан паст қисмини ушлаб, шилқимлик қилганини, содир этган қилмишидан пушаймон эканини айтган ҳамда суддан ўзига нисбатан енгиллик беришни сўраган.
Суд уни Маъмурий жавобгарлик тўғрисидаги кодекснинг 41-1-моддаси (шаҳвоний шилқимлик қилиш) 1-қисми билан айбли деб топган ва беш сутка маъмурий қамоқ жазоси тайинланган.
