Тошкент шаҳри ва вилоятида фаолият юритган қалбаки дори воситалари ишлаб чиқариш ва уларни сотиш билан шуғулланган яширин цех фаолиятига барҳам берилди. Бу ҳақда “Darakchi.uz” Давлат хавфсизлик хизмати маълум қилди.
Билдирилишича, Тошкент шаҳрида яшовчи, 1984 йилда туғилган фуқаро томонидан ижарага олинган Тошкент туманидаги хонадон кўздан кечирилганда, у ерда ноқонуний дори воситалари ишлаб чиқарилган ва сотилган.
Яширин цехда хавфсизлик талаблари ва ҳужжатларсиз тайёрланган 49 турдаги жами 594 127 дона “Фусис”, “Просулпин”, “Урсосан”, “Арбидол” ва бошқа номдаги дорилар, шунингдек, 50 та ускуна, хомашё, этикета, капсула ва қадоқлаш материаллари топилиб, далилий ашёлар сифатида расмийлаштирилди.
Шунингдек, гумонланувчининг Тошкент шаҳрининг Учтепа туманидаги уйи ҳам кўздан кечирилиб, у ердан 28 640 дона дори воситаси, 75 дона ампула, 46 дона суюқлик, 18 280 дона номсиз суппозиторий ва бошқа ноқонуний дорилар ҳамда уларни тайёрлашга мўлжалланган қолиплар аниқланиб, олиб қўйилди.
Терговга қадар текширувларда маълум бўлишича, гумонланувчи дориларни тайёрлаш учун хомашёларни интернет орқали номаълум шахслардан харид қилган. Таҳлилларга кўра, мусодара қилинган маҳсулотлар ва ускуналарнинг умумий қиймати 10 миллиард сўмга тенг.
Аниқланишича, қалбаки дорилар Тошкент ва Бухоро вилоятларидаги айрим дорихоналарга ҳам тарқатилган. Ҳозирда уларнинг савдосига чек қўйилган.
Ушбу ҳолат юзасидан Жиноят кодексининг 186-прим-3-моддаси 3-қисми “а” банди билан жиноят иши қўзғатилиб, тергов ҳаракатлари давом этмоқда.
Шунингдек, Иқтисодий жиноятларга қарши курашиш департаменти билан ҳамкорликда ўтказилган яна бир тадбирда Тошкентда яшовчи 1992 йилда туғилган шахс ва унинг шериги – банк ходими, 1996 йилда туғилган фуқаро, Хитойдан олиб келинган 798 қути (574 560 дона) инфузион тизимларни 55 700 АҚШ долларига сотаётган пайтда қўлга олинди.
Экспертиза хулосасига кўра, умумий қиймати 1 миллиард сўмлик тиббий буюмлар фойдаланиш учун яроқсиз ҳисобланади. Уларнинг сақланиши, сотилиши ва тиббиётда қўлланилиши тақиқланган.
Мазкур ҳолат юзасидан ҳам Жиноят кодексининг юқоридаги моддаси асосида жиноят иши қўзғатилиб, суриштирув ишлари олиб борилмоқда.
