Рақобат қўмитаси товар-хомашё биржасида АИ-80 автомобил бензини нархининг юқори чегарасини белгилади.
Қўмитанинг 12-ноябрдаги топшириғига кўра, чоршанба кунидан бошлаб АИ-80 бензини нархининг сотувчининг бошланғич нархига нисбатан 5% миқдорида ўсишига чеклов жорий этилди. Бундан ташқари, битта қўлга 4 тонна бензин сотиш чеклови ҳам сақлаб қолинади.
Шундай қилиб, Бухоро нефтни қайта ишлаш заводи ишлаб чиқарган бензиннинг дастлабки нархи бир тоннаси учун 8 931 005 сўмни ташкил этса, жорий этилган чекловни ҳисобга олган ҳолда бир тонна бензиннинг энг юқори нархи 9 377 555,25 сўмга тенг бўлади.
Ноябр ойида АИ-80 бензинининг биржа нархи бир тонна учун 10 млн сўмдан ошиб кетди. Ҳозирги кунда ёқилғи тахминан шу нарх доирасида сотилмоқда, таклиф эса барқарор равишда 2,2 минг тоннадан юқори бўлиб турибди.
