Ижтимоий тармоқларда Андижон вилояти Олтинкўл тумани Қорақалпоқ маҳалласида жойлашган 38-мактаб директорининг мактаб ўқувчилари билан тарбиявий суҳбат жараёнида улардан икки нафарини бир неча бор ургани акс этган видеолавҳа тарқалди.
Вилоят Мактабгача ва мактаб таълими бошқармаси мазкур ҳолат юзасидан расмий маълумот берди.
Маълумотда қайд этилишича, воқеани ўрганиш бўйича Бошқарманинг ишчи гуруҳи тузилган ва ўрганиш якунларига кўра батафсил маълумот бериш режалаштирилмоқда.
"Шу ўринда Андижон вилояти Мактабгача ва мактаб таълими бошқармаси зўравонликнинг ҳар қандай турини кескин қоралаган ҳолда, ўқитувчи ва ўқувчи муносабатларида педагогик этика қоидаларига риоя этиш зарур эканлигини маълум қилади", дейилади Бошқарма муносабатида
Шунингдек, ушбу ҳолат Болалар омбудсмани томонидан назоратга олинди. Ҳозирда мазкур ҳолат юзасидан терговга қадар текширув ҳаракатлари олиб борилмоқда.
