Ноҡонуний миграцияга қарши курашиш доирасида Давлат хавфсизлик хизмати ҳамда Бош прокуратура ҳузуридаги Департамент ходимлари ҳамкорлигида Навоий ва Қашқадарё вилоятларида тезкор тадбирлар ўтказилди.
Маълум бўлишича, Навоий шаҳрида фаолият юритувчи сайёҳлик фирмаси раҳбари Хатирчи туманида яшовчи 2006 йилда туғилган фуқаронинг ишончига кириб, уни Болгарияга ишга юбориш учун барча ҳужжатларни тайёрлаб беришни ваъда қилган. У мазкур хизмат эвазига 3 минг АҚШ долларини олган вақтида ашёвий далиллар билан ушланди.
Шунга ўхшаш ҳолат Китоб туманида ҳам фош этилди. Тошкент вилоятида яшовчи 1997 йилда туғилган шахс икки нафар фуқарони Исроилга ишга юбориш ва ишчи визасини “танишлари орқали” тайёрлаб беришни ваъда қилиб, 20 минг АҚШ доллари талаб қилган. Тезкор тадбир давомида у Қашқадарёга келиб, келишилган пулнинг 5 минг долларини олган вақтида қўлга олинди.
Ҳозирда ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда.
Мутасаддилар фуқароларни хорижга ишга жўнатиш бўйича ижтимоий тармоқлардаги шубҳали таклифларга нисбатан эҳтиёткор бўлишга чақирди. Шунингдек, фақат Вазирлар Маҳкамаси ҳузуридаги Миграция агентлиги ёки тегишли лицензияга эга хусусий бандлик агентликлари хизматларидан фойдаланиш тавсия этилди.
Фуқаролардан шу каби қонунбузилиш ҳолатларига дуч келганда ДХХнинг 1520 қисқа рақамига мурожаат қилиш сўралди. Шахснинг сир сақланиши кафолатланади.
