Qo‘lyozma maktubda Epshteyn o‘z taqdirini o‘zi belgilash haqida yozgan bo‘lib, unda: “Hayrlashish vaqtini o‘zi tanlay olish — yoqimli”, degan jumlalar keltirilgan.
Eslatib o‘tamiz, amerikalik moliyachi Jeffri Epshteyn 2019 yil avgust oyida Manxettendagi qamoqxona kamerasida o‘lik holda topilgan edi. Rasmiylar uning o‘limini o‘z joniga qasd qilish sifatida baholagan.
Mazkur maktub Epshteyn bilan bir kamerada saqlangan sobiq politsiyachi Nikolas Tartalyone tomonidan topilgani aytilmoqda. Qotillikda ayblangan Tartalyone hozirda umrbod qamoq jazosini o‘tamoqda.
Nyu-York federal sudyasi Kennet Karas The New York Times nashri so‘rovidan so‘ng hujjatni ochiqlashga qaror qilgan. Sudyaga ko‘ra, maktub sud materiallari tarkibida bo‘lgani uchun u jamoatchilikka ochiq hujjat hisoblanadi.
Shu bilan birga, sud maktubning haqiqiyligiga baho bermagan. Sudya Karas bu masala hujjatni e’lon qilish qaroriga daxl qilmasligini ta’kidlagan.
Sud materiallariga ko‘ra, sarg‘ish qog‘ozga shoshilinch tarzda yozilgan maktubda quyidagi satrlar bor:
“Meni oylar davomida tergov qilishdi — hech narsa topishmadi. Oqibatda 15 yillik ayblovlar paydo bo‘ldi. Hayrlashish vaqtini o‘zi tanlay olish yoqimli. Mendan nima kutgandingiz — dod solib yig‘lashimmimi?”
Ma’lumot uchun, Jeffri Epshteyn ilk bor 2000-yillar boshida voyaga etmagan qizlarni jinsiy ekspluatatsiya qilish bilan bog‘liq ishlarda tilga tushgan. 2019 yil iyul oyida u yana hibsga olinib, Nyu-York va Floridada voyaga etmagan qizlarni jalb qilish hamda ularga nisbatan jinsiy zo‘ravonlik qilishda ayblangan edi.
Maktub haqidagi ma’lumotlar dastlab 2025 yilda Nikolas Tartalyone ishtirok etgan podkastlardan birida aytilgan. Biroq The New York Times bu haqda material e’lon qilgach, hujjat keng jamoatchilik e’tiborini tortdi.
Gazetaga ko‘ra, mazkur maktub federal tergovchilar qo‘liga tushmagan va Adliya vazirligi tomonidan Epshteyn ishi yuzasidan avval e’lon qilingan hujjatlar orasida ham bo‘lmagan.
