Hormuz bo‘g‘ozida yuzaga kelgan zo‘ravonliklar va AQSh hamda Eron o‘rtasidagi taranglik sabab jahon neft bozorida narxlar keskin ko‘tarildi.
Jahon bozorida asosiy ko‘rsatkich hisoblangan Brent nefti narxi qariyb 6 foizga o‘sib, barreli 114 dollardan oshdi. Keyinchalik esa narxlar biroz pasayib, 113 dollar atrofida savdo qilindi.
Narxlarning o‘sishi AQSh harbiylari Eronga tegishli bir nechta qayiqlarni yo‘q qilganini ma’lum qilganidan so‘ng kuzatildi. Shu bilan birga, BAA hududiga raketa va dron hujumlari bo‘lgani haqida xabarlar ham vaziyatni yanada keskinlashtirdi.
Eron tomoni esa bu da’volarni rad etib, ularni noto‘g‘ri ma’lumot deb atadi.
Mutaxassislarga ko‘ra, bozordagi o‘sish neft infratuzilmasiga zarar yetishi va strategik ahamiyatga ega Hormuz bo‘g‘zi yopilib qolishi mumkinligi haqidagi xavotirlar bilan bog‘liq.
Ayni paytda, xavfsizlik muammolari sabab kemalarning ushbu yo‘ldan harakatlanishi sekinlashgan va dengiz qatnovi hali to‘liq tiklanganicha yo‘q.
