Peru prokuraturasi fuqarolar Rossiyada ish va yuqori maoshli lavozimlar va’dasi bilan aldanib, keyinchalik Ukrainadagi urushga jalb qilingani bo‘yicha tergov boshladi.
Ma’lumotlarga ko‘ra, jabrlanganlarga oyiga 2 000–3 000 dollar maosh va’da qilingan. Hozirgacha taxminan 600 nafar perulik Rossiya tomonidan jang qilishga jalb etilgani aytilmoqda. Huquq himoyachilari esa Ukrainadagi urushda 13 nafar perulik halok bo‘lganini bildirgan.
Rossiyaning Lima shahridagi elchixonasi ayrim fuqarolar Rossiya qurolli kuchlari bilan shartnoma imzolaganini tasdiqlagan. Peru Tashqi ishlar vazirligi esa fuqarolar xorijiy harbiy xizmatga kirishdan oldin ruxsat olishi shartligini eslatgan.
Hozirda tergov “odam savdosi” va “og‘ir odam savdosi” moddalari bo‘yicha olib borilmoqda.
