“Toshkent-Aero” ixtisoslashtirilgan bojxona kompleksi “Toshkent xalqaro aeroporti” chegara bojxona posti xodimlari tomonidan Bangkokdan uchib kelgan yo‘lovchilardan biriga tegishli qo‘l yuki va bagaj tekshirilganda shubhali holat aniqlandi. Tekshiruv davomida yuklar orasida turli qadoqlar ichiga yashirilgan 12 ta polietilen o‘ram topilgan.
Belgilangan tartibda va xolislar ishtirokida o‘ramlar ochib ko‘rilganda, ichidagi yashil rangli o‘tkir hidli modda Markaziy bojxona laboratoriyasi xulosasiga ko‘ra, 6,3 kilogrammdan ortiq quritilgan marixuana ekani ma’lum bo‘lgan. Ushbu modda O‘zbekistonda muomalasi taqiqlangan giyohvandlik vositasi hisoblanadi.
Holat yuzasidan bojxona organlari tomonidan jinoyat ishi qo‘zg‘atildi.
Ma’lum qilinishicha, joriy yilning dastlabki choragida “Toshkent-Aero” ixtisoslashtirilgan bojxona kompleksi tezkor tuzilmalari va bojxona postlari tomonidan aniqlandigan 15 ta holatda qariyb 30 kilogramm og‘irlikdagi giyohvandlik vositalari, jumladan sintetik narkotiklarning chegara orqali noqonuniy olib o‘tish va ichki hududdagi yashirin aylanishiga chek qo‘yilgan.
Olib qo‘yilgan giyohvandlik vositalari o‘tgan yilning shu davriga nisbatan 18 kilogrammga oshgani qayd etildi.
